Cando o príncipe-bispo Johann Konrad von Gemmingen (1593/95-1612) emprendeu unha renovación radical do castelo de Willibaldsburg, con vistas ao río Altmühl, en Eichstätt (Baviera), tamén creou ao seu redor un xardín palaciano de gran magnificencia. Co fin de preservar o xardín para as xeracións futuras —e proporcionar un catálogo permanente do seu contido que recompilase plantas das catro estacións e as presentase nese orde— encargou ao director do xardín, o boticario de Núremberg Basilius Besler (1561-1629), e a un equipo de gravadores que inmortalizasen os seus tesouros nunha colección de láminas impresas.
O resultado foi o Hortus Eystettensis, publicado en Núremberg en 1613. Coas súas 367 láminas coloreadas a man e descricións detalladas, foi unha obra de execución meticulosa e diversidade espectacular, notablemente custosa para a época. Como o xardín contiña plantas importadas de lugares exóticos, os tres volumes exhibiron unha variedade destacable, con un total de 90 familias e 340 xéneros. Debido á execución decorativa e estilizada destas ilustracións, onde comeza a verse as plantas en termos estéticos máis que meramente prácticos ou medicinais, o libro está considerado un fito na arte da ilustración botánica. Aínda que se publicou antes da aparición dos sistemas de clasificación estandarizados, o propio Carl Linnaeus describiuno máis tarde como unha “obra incomparable”.
O catálogo de Besler sobreviviu aos xardíns, que foron destruidos en 1634 polas tropas invasoras suecas durante a guerra dos Trinta Anos. Con todo, un longo proxecto de remodelación no sitio histórico culminou coa apertura do moderno Bastionsgarten en 1998, que contén moitas das plantas que se amosan no Hortus Eystettensis.
Esta edición facsímile presenta reproducións de alta calidade destas impresionantes ilustracións, baseadas na copia do Hortus Eystettensis da biblioteca da Universidade de Eichstätt-Ingolstadt, e está acompañada de descricións detalladas do significado botánico, farmacéutico e simbólico de cada planta e dun apéndice con ensaios que sitúan o xardín e o libro nos seus contextos históricos.
Esta edición presenta unha valiosa obra da literatura botánica que, nas raras ocasións en que aparece unha copia orixinal no mercado, pode acadar prezos de máis dun millón de dólares nunha subasta. En liña coa intención orixinal de Besler, este facsímile pon o xardín ao alcance dun público máis amplo e consérvao para a posteridade.
