Por que biólogas, biólogos e profesionais clínicos necesitan escoitar e incorporar as experiencias das persoas, os colectivos e as culturas intersexuais? Como transforma ese diálogo o coñecemento experto da bioloxía e as recomendacións médicas? Que implicacións ten definir cal é a lonxitude «adecuada» dunha vagina e ata onde pode ou debe adaptarse, tanto en termos biolóxicos como existenciais?
A partir destas preguntas, Artesanías biológicas convida a repensar a bioloxía e a medicina desde as epistemoloxías feministas, os estudos sociais da ciencia e a diversidade corposexual. Sam Fernández-Garrido propón desfacer as divisións ríxidas entre os saberes biomédicos expertos e os chamados saberes «leigos», entendendo este cruce como unha práctica bioluminiscente capaz de recuperar visións sobre os tecidos, as hormonas e os corpos clínicamente significativas, aínda que historicamente subordinadas.
A obra constitúe unha achega relevante ao campo das bioloxías feministas e propón pensar a bioloxía como unha hospitalaria «zona de contacto», atravesada por encontros inesperados. Alí onde estes encontros se celebran en lugar de percibirse como unha ameaza, reaparece a posibilidade de construír colectivamente outros arquivos corporais. Arquivos bioluminiscentes que reelaboran a bioloxía e a clínica, ao tempo que reivindican o cruce entre ciencia, arte e activismos como un espazo común desde o que coidar unha diversidade que xa non pode seguir sendo allea.
