Desde o nacemento da modernidade, a produción visual e a música tiveron unha relación especialmente íntima. Desde o manifesto futurista de 1913 de Luigi Russolo L’Arte dei Rumori (A arte dos ruídos) ata os discos de dobre cara Rotereliefs de Marcel Duchamp, o século XX produciu un fértil intercambio entre sons e formas, entre símbolos e melodías, e entre os diferentes campos da composición e a interpretación.
Nesta antoloxía única realizada por Francesco Spampinato, que reúne 450 portadas de discos concebidas como obras artísticas en si mesmas desde a década de 1950 ata hoxe, descubrimos o ritmo dunha historia creativa singular. Un despregue que revela como o modernismo, a arte pop, o conceptual, o postmodernismo e diversas expresións de arte contemporánea deron forma a este particular campo de produción visual e axudaron á distribución popular da música a través de imaxes míticas. Un imaxinario que evoca de xeito suxerente e inmediato a experiencia auditiva.
No camiño, atopámonos cos xeroglíficos urbanos de Jean-Michel Basquiat para o seu propio selo discográfico, Tartown; o grafiti de Banksy para Blur e a bolboreta ensartada de Salvador Dalí para Lonesome Echo, de Jackie Gleason. As portadas veñen acompañadas de breves análises de cada unha delas, ademais dunha ficha co nome do artista, o intérprete, o título do álbum, a discográfica e o ano de lanzamento, así como información sobre a obra de arte orixinal. Entrevistas con Tauba Auerbach, Shepard Fairey, Kim Gordon, Christian Marclay, Albert Oehlen e Raymond Pettibon engaden reflexións e puntos de vista persoais sobre esta relación colaborativa e cativadora entre artistas visuais e músicos.
